شام سے متعلق امن کانفرنس، تاریخ طے نہ ہو سکی

خبر رساں ادارے اے ایف پی نے اقوام متحدہ اور عرب لیگ کے نمائندہ خصوصی برائے شام لخضر براہیمی کے حوالے سے بتایا ہے کہ کوشش کی جا رہی ہے کہ اس کانفرنس کا انعقاد رواں برس کے اختتام تک ممکن ہو سکے۔ منگل کو جنیوا میں صحافیوں سے گفتگو کرتے ہوئے براہیمی نے کہا، ’’ہم امید کر رہے تھے کہ ہم آج اس کانفرنس کی حتمی تاریخ کا اعلان کر دیں گے، لیکن بدقسمتی سے ہم ناکام ہو گئے ہیں۔‘‘ لخضر براہیمی نے مزید کہا کہ وہ پچیس نومبر کو ایک بار پھر روسی اور امریکی حکام سے ملیں گے تاکہ اس کانفرنس کے انعقاد میں زیادہ دیر نہ ہو۔

براہیمی کے اس بیان سے قبل عالمی سفارتکاروں نے جنیوا میں دن بھر سیر حاصل مذاکرات کیے، جن کا مقصد شامی بحران کے خاتمے کے لیے اس بین الاقوامی کانفرنس کے انعقاد کے لیے تیاریاں مکمل کرنا تھا۔ ستمبر میں روس اور امریکا کے مابین ہونے والی ایک ڈیل کے تحت شام کے کیمیائی ہتھیاروں کو ناکارہ بنانے پر اتفاق رائے کے بعد یہ امید پیدا ہو گئی تھی کہ شامی بحران کے حل کے لیے شاید تمام فریق مذاکرات کی میز پر آ جائیں گے، جس کی وجہ سے شام میں قیام امن کے لیے کسی سمجھوتے تک پہنچنے میں مدد ملے گی۔

لخضر براہیمی نے بتایا کہ شامی اپوزیشن ’جنیوا ٹو‘ نامی اس کانفرنس میں اپنی شرکت کے حوالے سے منقسم ہے تاہم انہوں نے امید ظاہر کی کہ وہ اس کانفرنس کے لیے ایک وفد نامزد کرنے کی طرف رواں ہے۔ اس تناظر میں الجزائر سے تعلق رکھنے والے تجربہ کار ثالث براہیمی نے مزید کہا، ’’یہ ایک بڑا قدم ہو گا، جس سے اس کانفرنس کا انعقاد ممکن ہو سکے گا۔‘‘

ادھر شامی اپوزیشن گروپوں کی نمائندہ سیریئن نیشنل کولیشن نے کہا ہے کہ اس کا ایک اجلاس آئندہ ہفتے کے روز استنبول میں ہو رہا ہے، جس میں یہ اپوزیشن اتحاد فیصلہ کرے گا کہ آیا اسے ’جنیوا ٹو‘ کانفرنس میں شرکت کرنا چاہیے۔ سیریئن نیشنل کولیشن کا موقف ہے کہ مذاکرات سے قبل شامی صدر بشار الاسد کو اقتدار سے الگ ہو جانا چاہیے جبکہ صدر اسد اس مطالبے کو مسترد کرتے ہیں۔ اسی طرح اس کانفرنس میں شامی صدر بشار الاسدکے حامی ملک ایران کی شرکت بھی ایک تنازعہ بنا ہوا ہے۔

ایک اعلیٰ امریکی اہلکار نے اپنا نام مخفی رکھنے کی شرط پر اے ایف پی کو بتایا کہ یہ کانفرنس رواں برس کے اواخر تک منعقد ہو سکتی ہے۔ کانفرنس کی اہمیت پر تبصرہ کرتے ہوئے اس امریکی اہلکار نے کہا، ’’یہ شام کے مستقبل سے متعلق ہے۔ یہ ایک طویل، مشکل اور پیچیدہ عمل ہے۔ اگر اس سلسلے میں تیاری کے لیے شامی اپوزیشن مزید کچھ ہفتے چاہتی ہے تو ہمیں اس حوالے سے تعاون کرنا چاہیے۔‘‘

ادھر پولینڈ کے دورے پر گئے ہوئے امریکی وزیر خارجہ جان کیری نے کہا ہے کہ اس امن کانفرنس کا مقصد شام میں ایک ایسی عبوری حکومت کی تشکیل ہے، جو شام میں تمام فریقوں کے لیے قابل قبول ہو۔ قبل ازیں جان کیری نے اپنے دورہ سعودی عرب کے دوران سعودی رہنماؤں سے بھی شام کے بارے میں تفصیلی گفتگو کی تھی۔ شامی باغیوں کے بڑے حامی عرب ممالک سعودی عرب اور قطر کا کہنا ہے کہ شامی بحران کے خاتمے کے لیے ایک نظام الاوقات وضع کیا جائے تاکہ یہ مسئلہ مزید طول نہ پکڑے۔