سندھ: توہین مذہب کا ملزم ڈاکٹر مبینہ پولیس مقابلے میں ہلاک

پاکستان کے صوبہ سندھ میں پولیس نے توہین مذہب کے الزام کا سامنا کرنے والے ایک ڈاکٹر کو مبینہ پولیس مقابلے میں ہلاک کر دیا ہے۔ یہ ایک ہفتے کے دوران اس نوعیت کے ماورائے عدالت کا دوسرا واقعہ ہے، جس کی انسانی حقوق کے  گرپوں نے شدید مذمت کی ہے۔ پولیس نے مقتول کی شناخت ڈاکٹر شاہ نواز کے نام سے کی ہے، جو دو روز قبل مبینہ طور پر پیغمبراسلام کی توہین اور سوشل میڈیا پر گستاخانہ مواد شیئر کرنے کے الزام کے بعد روپوش ہو گئے تھے۔

مقامی پولیس کے سربراہ نیاز کھوسو نے کہا کہ بدھ کی رات پولیس افسران نے صوبہ سندھ کے شہر میرپور خاص میں موٹر سائیکل پر سوار دو افراد کو رکنے کا اشارہ کیا، تو انہوں نے رکنے کے بجائے، پولیس پر فائرنگ کی اور فرار ہونے کی کوشش کی، جس کے بعد پولیس نے جوابی فائرنگ کرتے ہوئے ملزم شاہ نواز کو ''موقع پر ہلاک‘‘کر دیا۔ انہوں نے کہا کہ ملزمان میں سے ایک موٹر سائیکل پر فرار ہو گیا۔

کھوسو نے دعویٰ کیا کہ فائرنگ کے تبادلے کے بعد ہی افسران کو معلوم ہوا کہ مقتول وہ ڈاکٹر تھے، جنہیں مبینہ طور پر توہین مذہب کے الزام میں ڈھونڈا جا رہا تھا۔ سوشل میڈیا پر گردش کرنے والی ویڈیوز میں مقامی علماء کو پولیس پر گلاب کی پتیاں نچھاور کرتے اور توہین رسالت کے ملزم کو ہلاک کرنے پر افسران کی تعریف کرتے ہوئے دکھایا گیا ہے۔ ملزم کی ہلاکت کن حالات میں ہوئی اس بارے میں سندھ حکومت کی جانب سے فوری طور پر کوئی وضاحت نہیں کی گئی۔

انسانی حقوق کی تنظیموں کی مذمت

غیر سرکاری تنظیم انسانی حقوق کمیشن آف پاکستان (ایچ آر سی پی) کی طرف سے شاہ نواز کے قتل کی سخت مذمت کرتے ہوئے کہا گیا ہے کہ توہین مذہب کے الزام میں دو افراد کے مبینہ ماورائے عدالت قتل پر سخت تشویش ہے۔ بیان میں مزید کہا گیا، ''توہین مذہب کے معاملات میں تشدد کا یہ انداز، جس میں مبینہ طور پر قانون نافذ کرنے والے اہلکار ملوث ہیں، ایک تشویشناک رجحان ہے۔‘‘ ایچ آر سی پی نے حکومت سے یہ بھی کہا کہ وہ یہ معلوم کرنے کے لیے ایک آزادانہ انکوائری کرے کہ شاہ نواز کی موت کا ذمہ دار کون ہے اور اس کے ذمہ داروں کو سزا دی جائے۔

میرپور خاص میں نواز کا قتل، قریبی شہر عمر کوٹ میں اسلام پسندوں کی جانب سے ان کی گرفتاری کا مطالبہ کرنے والے احتجاج کے ایک دن بعد کیا گیا۔ بتایا گیا ہےکہ بدھ کو ایک مشتعل ہجوم نے شاہ نواز کے کلینک کو جلا دیا تھا۔
تازہ ترین ہلاکت کا یہ واقعہ کوئٹہ میں ایک پولیس اسٹیشن کے اندر ایک پولیس افسر کی جانب سے مبینہ طور پر توہین مذہب کے الزام میں گرفتار ایک اور مشتبہ شخص عبدالعلی کو فائرنگ کر کے ہلاک کرنے کے واقعے کے  کے ایک ہفتے بعد ہوئی ہے۔

52 سالہ عبدالعلی عرف سخی لالہ کو گزشتہ ہفتے صوبہ بلوچستان کے دارالحکومت کوئٹہ کی پولیس نے ایک مشتعل ہجوم سے بچانے کے بعد گرفتار کیا تھا۔ اس ہجوم کادعویٰ  تھا کہ ملزم نے پیغمبر اسلام کی توہین کی تھی۔ بعد میں عبدالعلی  کو ایک پولیس افسر سعید محمد سرحدی نے دوران حراست فائرنگ کر کےمار ڈالا۔ اس پولیس افسر کو واقعے کے فوری بعد گرفتار کر لیا گیا تھا۔ تاہم بعد ازاں مقتول کے قبیلے اور  اہل خانہ کے افراد نے اس پولیس افسر کو یہ کہتے ہوئے معاف کر دیا کہ مقتول عبدالعلی نے پیغمبر اسلام کی توہین کر کے مسلمانوں کے جذبات کو ٹھیس پہنچائی۔

توہین مذہب کے الزامات پر بڑھتا ہوا تشدد

اگرچہ پاکستان میں ہجوم کے ہاتھوں توہین رسالت کے مشتبہ ملزمان کی ہلاکتیں عام ہیں لیکن توہین مذہب کے معاملے میں پولیس کے ذریعے ماورائے عدالت قتل شاذ و نادر ہی ہوتے ہیں۔   بعض اوقات توہین مذہب کے الزامات  محض افواہ ہی ہوتے ہیں اور اکثر ہجوم کے ذریعہ فسادات اور ہنگامہ آرائی کو جنم دیتے ہیں، جن کی نوبت انسانوں کی ہلاکتوں تک بھی پہنچ سکتی ہے۔

 پاکستان کے متنازعہ توہین رسالت کے قوانین کے تحت اسلام یا اسلامی مذہبی شخصیات کی توہین کے مرتکب پائے جانے والے کو موت کی سزا سنائی جا سکتی ہے۔ تاہم حکام نے ابھی تک توہین رسالت کے جرم میں موت کی سزا پر عمل درآمد نہیں کیا ہے۔ پاکستان میں حالیہ برسوں میں توہین مذہب کے مشتبہ افراد پر حملوں میں اضافہ دیکھا گیا ہے۔

جون میں ایک مشتعل ہجوم نے صوبہ خیبر پختونخواہ کے ضلع مدین میں ایک پولیس اسٹیشن میں گھس کر ایک زیر حراست شخص کو قران کی مبینہ بے حرمتی کے الزام میں قتل کر دیا تھا۔ مقتول ایک سیاح تھا، جو لاہور سے سیاحت کی خاطر اس علاقے میں پہنچا تھا۔ اسی طرح گزشتہ برس صوبہ پنجاب کے ضلع جڑانوالہ میں ایک پر تشدد ہجوم نے کلیساؤں اور مسیحیوں کے گھروں پر یہ دعویٰ کرنے کے بعد حملے کیے کہ انہوں نے ایک مقامی مسیحی اور اس کے دوست کو قرآن کے صفحات کی بے حرمتی کرتے ہوئے دیکھا۔

 ان حملوں کی ملک بھر میں مذمت کی گئی، لیکن مسیحی برادری کا کہنا ہے کہ اس تشدد میں ملوث افراد کے خلاف مقدمے کی کارروائی ابھی تک شروع نہیں کی جا سکی۔

ش ر⁄ اب ا (اے پی)