سری لنکا: انورا کمارا ڈسانائیکے نئے صدر منتخب

سری لنکا کے الیکشن کمیشن نے آج اتوار کے روز صدارتی انتخابات میں ووٹوں کی گنتی مکمل ہونے کے بعد بائیں بازو کے مارکسسٹ رہنما انورا کمارا ڈسانائیکے کی جیت کا اعلان کیا۔

الیکشن کمیشن کے مطابق صدارتی انتخابات میں ڈالے گئے کل ووٹوں میں سے 42.31 فیصد پیپلز لبریشن فرنٹ پارٹی کے لیڈر انورا کمارا ڈسانائیکے کی حمایت میں ڈالے گئے۔ اس دوڑ میں 32.76 فیصد ووٹوں کے ساتھ اپوزیشن رہنما ساجیت پریماداسا دوسرے نمبر پر رہے اور 2022ء سے اب تک سری لنکا کے صدر رہنے والے رانیل وکرما سنگھے 17.27 فیصد ووٹوں کے ساتھ تیسرے نمبر پر رہے۔ 

الیکشن کمیشن کے حکام کے مطابق 55 سالہ انورا کمارا ڈسانائیکے کل پیر کے روز صدارت کا حلف اٹھائیں گے۔

 انورا کمارا ڈسانائیکا ایک زمانے میں مارکسسٹ پارٹی کے رہنما تھے اور ان کا ماضی پُرتشدد کاروائیوں سے  داغدار ہے۔ انورا کمارا ڈسانائیکا کی پارٹی نے سن 1970 اور 1980ء کی دہائیوں میں دو ناکام بغاوتوں کی قیادت کی تھی، جس میں 80,000 سے زیادہ لوگ مارے گئے تھے اور اس پارٹی نے گزشتہ پارلیمانی انتخابات میں چار فیصد سے بھی کم ووٹ حاصل کیے تھے۔

آئی ایم ایف ڈیل کا کیا ہوگا؟

اس الیکشن سے قبل آٹھ ہفتے جاری رہنے والی انتخابی مہم میں اقتصادی مسائل پر توجہ مرکوز کی گئی تھی۔

سری لنکا کی عوام میں اس وقت دو سال پہلے ملک میں ایک معاشی بحران کے باعث پیدا ہونے والی مشکلات پر غم و غصہ پایا جاتا ہے۔ صدر رانیل وکرما سنگھے نے ملک کی باگ ڈور 2022ء میں تب سنبھالی تھی جب یہ بحران اپنے عروج پر تھا۔ پھر عالمی مالیاتی فنڈ (آئی ایم ایف) کی جانب سے ایک بیل آؤٹ پیکج کے حصول کے لیے ان کی حکومت نے سخت پالیسیاں اپنائی تھیں۔

آج الیکشن کے حتمی نتائج کے اعلان سے پہلے انورا کمارا ڈسانائیکا کی پیپلز لبریشن فرنٹ پارٹی کے ایک رکن بمل رتنائیک نے خبر رساں ادارے  اے ایف پی سے گفتگو کے دوران کہا تھا کہ ڈسانائیکا کی جیت کی صورت میں آئی ایم ایف کے ساتھ کی گئی ڈیل کو ختم تو نہیں کیا جائے گا، البتہ اس میں تبدیلیوں کی کوشش کی جائے گی۔

ان کا مزید کہنا تھا کہ ڈسانائیکا نے انکم ٹیکس اور اشیا خور و نوش اور ادویات پر سیلز ٹیکس میں کمی کا وعدہ کیا ہے اور ان کی پارٹی سمجھتی ہے کہ ان اقدامات کے ساتھ آئی ایم ایف کے پروگرام کو اس کی چار سالہ مدت تک جاری رکھا جا سکے گا۔

م ا ⁄ ع آ (اے ایف پی، روئٹرز)