افغان صدارتی انتخابات کے حتمی نتائج کا اعلان ملتوی

حکام کے مطابق سابق صدرحامد کرزئی کے جانشین کے چناؤ کے لیے ہونے والی ووٹنگ کے پہلے مرحلے میں دھاندلی سے متعلق تحقيقاتی کارروائی ابھی مکمل نہیں ہوئی ہے۔

پانچ اپریل کو منعقد ہونے والے صدارتی الیکشن کے ابتدائی نتائج گزشتہ ماہ کے اواخر میں جاری کر دیے گئے تھے تاہم اس کے حتمی نتائج پر کئی ہفتوں سے جاری مبینہ دھاندلیوں کے الزامات کی تفتیشی کارروائی اثر انداز ہو سکتی ہے۔ خبر رساں ایجنسی اے ایف پی کو آزاد الیکشن کمیشن آئی ای سی کے ترجمان نور محمد نے ایک بیان دیتے ہوئے بتایا کہ حتمی فیصلے کا اعلان غیر معینہ تاریخ تک کے لیے ملتوی کر دیا گیا ہے۔ اُن کا کہنا تھا، ’’ہمیں الیکشن کمپلینٹس کمیشن ای سی سی کی طرف سے تفتیشی رپورٹ اور اُس کا حتمی فیصلہ موصول نہیں ہوا ہے۔ ہم اس کے جلد سے جلد پہنچنے کی امید کر رہے ہیں۔‘‘

اس بار کے صدارتی انتخابات کے ابتدائی نتائج میں تمام آٹھ امیدواروں میں سے کسی ایک کو بھی 50 فیصد سے زیادہ ووٹ نہیں ملے تھے۔ کوئی بھی اُمیدوار واضح برتری حاصل نہیں کر پایا تھا جس کے بعد فاتح کا فیصلہ انتخابات کے دوسرے مرحلے کی ووٹنگ کے بعد ہوگا۔

الیکشن میں کانٹے کا مقابلہ سابق وزیر خارجہ عبداللہ عبداللہ اور ماضی میں ورلڈ بینک سے وابستہ رہنے والے ماہر اقتصادیات اشرف غنی کے مابین تھا۔ ووٹنگ کے پہلے مرحلے میں عبداللہ عبداللہ کو 44.9 فیصد اور اشرف غنی احمد زئی کو 31.5 فیصد ووٹ ملے تھے۔

حامد کرزئی، جو افغانستان میں 2001 ء میں طالبان حکومت کے خاتمے کے بعد سے اب تک صدر کے عہدے پر فائض ہيں، اس الیکشن میں آئین کے تقاضوں کو پورا کرتے ہوئے عہدے کے لیے تیسری بار الیکشن لڑنے سے قاصر تھے۔ ہندو کُش کی اس ریاست کو اب ایک نئے چیلنج کا سامنا ہے۔ رواں سال کے اواخر میں امریکی قیادت والی غیر ملکی افواج کا افغانستان سے مکمل انخلاء ہو جائے گا اور ملک کے نئے صدر کو اس نازک وقت میں مستقبل کے چیلنجز سے نمٹنا ہوگا۔

آج بُدھ کو عبداللہ عبداللہ نے ایک بیان میں کہا کہ اُن کی انتخابی مہم کے پاس الیکشن کے دوران ووٹنگ میں دھاندلیوں کے ثبوت موجود ہیں۔عبداللہ نے کہا، ’’یہ امر انتخابات کے حتمی نتائج پر گہرے اثرات مرتب کر سکتا ہے۔‘‘

اُدھر الیکشن کمپلینٹس کمیشن ای سی سی نے کہا ہے کہ وہ آج بُدھ ہی کو اپنی تفتیشی رپورٹ انڈیپنڈنٹ الیکشن کمیشن آئی ای سی کو روانہ کر دے گا۔ تولو نیوز ٹیلی وژن چینل پر بیان دیتے ہوئے ای سی سی کے ترجمان نادر محسنی نے کہا، ’’ہم نے اپنا کام گزشتہ رات ہی مکمل کر لیا تھا اور رپورٹ آج ہی آئی ای سی کو بھیج دی گئی ہے۔‘‘