اشتعال انگیز: ٹرمپ کے ایک سو دن مکمل ہوئے

بیس جنوری کو اپنی حلف برداری کے بعد ٹرمپ نے جو خطاب کیا، وہ اُن کی انتخابی مہم ہی کا ایک حصہ معلوم ہوتا تھا۔ اُنہوں نے بڑے جارحانہ انداز میں ’امریکا پہلے‘ کا نعرہ لگاتے ہوئے واضح کیا کہ اُن کی نئی پالیسیاں کس سمت میں جائیں گی۔ ٹرمپ نے کہا کہ ملک میں برسوں سے ایک ’قتلِ عام‘ جاری ہے، جسے اب ختم ہونا ہو گا۔ دنیا انگشت بدنداں ہے کہ یہ لیڈر آخر کیا کرنے والا ہے۔

کیا آپ کو بائیں تصویر میں دائیں تصویر کے مقابلے میں زیادہ لوگ نظر آ رہے ہیں؟ غلط۔ آپ دراصل ’متبادل حقائق‘ والی بات نہیں جانتے۔ دائیں تصویر میں دیکھا جا سکتا ہے کہ بیس جنوری کو ٹرمپ کی حلف برداری میں کتنے کم لوگ شریک ہوئے۔ آٹھ سال پہلے 2009ء میں باراک اوباما کو سننے والوں کی تعداد کہیں زیادہ تھی تاہم ٹرمپ کے مُشیر اس کے برعکس دعویٰ کرتے ہیں۔

صدر کی تیسری اہلیہ میلانیا ٹرمپ کا تعلق سلووینیا سے ہے تاہم اُن کے بارے میں زیادہ تفصیلات معلوم نہیں ہیں۔ وہ ایک ماڈل تھیں اور پہلے اُن کا نام کناؤس تھا۔ ان دونوں کی واحد اولاد ایک بیٹا بیرن ولیم ہے، جس کی پیدائش 2006ء کی ہے اور وہ جان ایف کینیڈی جونیئر کے بعد سے کسی صدر کا سب سے چھوٹا بیٹا ہے۔ کم از کم ملبوسات کے معاملے میں میلانی ٹرمپ کا موازنہ گاہے بہ گاہے جیکی کینیڈی کے سلتھ بھی کیا جاتا ہے۔

وائٹ ہاؤس کے نئے مکین کے خلاف احتجاج دوسرے روز ہی شروع ہو گیا تھا۔ صرف واشنگٹن میں ہی ’خواتین کے مارچ‘ نامی جلوس میں شرکاء کی تعداد تقریباً پانچ لاکھ رہی۔ نیویارک سے لے کر لاس اینجلس تک ہونے والے مظاہروں میں چالیس لاکھ سے زیادہ افراد شریک ہوئے۔ اس طرح ٹرمپ اپنی صدارت کے آغاز ہی سے امریکی معاشرے میں تقسیم کا اور مختلف گروہوں کے درمیان خلیج کو اور گہرا کرنے کا باعث بن رہے ہیں۔

ٹرمپ صدارتی فرامین کے ساتھ حکومت کر رہے ہیں۔ وہ مسلسل ایک کے بعد دوسرے صدارتی فرمان پر دستخط کر رہے ہیں اور یوں ایک ایسا راستہ اختیار کر رہے ہیں، جو مکمل طور پر قانونی بھی ہے اور جس میں وہ کانگریس سے بالا بالا اپنے انتظامی اختیارات استعمال کر رہے ہیں۔ کئی مسلمان ممالک کے شہریوں کے امریکا میں داخلے پر پابندی کے حکم کے ساتھ غالباً وہ بہت آگے چلے گئے کیونکہ عدالت نے اس فرمان پر عملدرآمد روک دیا۔

ٹرمپ متنازعہ صحافی اور دائیں بازو کے جریدے ’برائٹ بارٹ نیوز‘ کے سابق مدیر اعلیٰ اسٹیفن بینن کے خیالات سے بہت متاثر تھے اور اسی لیے اُنہوں نے خود کو اقتصادی قوم پرست کہنے والے بینن کو وائٹ ہاؤس میں اپنا مُشیرِ اعلیٰ بنا دیا۔ بیننن نے ٹرمپ کو پورے ریاستی ڈھانچے کی از سرِ نو تشکیل کا مشورہ دیا تاہم اپنی صدارت کے 76ویں روز ٹرمپ نے بینن کو قومی سلامتی کونسل سے نکال دیا۔

کیا ہوا جو سخت گیر بینن کے مشوروں کا سلسلہ ختم ہو گیا۔ کوئی خلا پیدا نہیں ہوا بلکہ  ٹرمپ کے ناتجربہ کار داماد جیرڈ کشنر صدر کے لیے زیادہ سے زیادہ اہم ہوتے چلے گئے۔ ٹرمپ کی بیٹی ایوانکا ٹرمپ کو بھی اپنے والد کی باقاعدہ مُشیر بنا دیا گیا ہے اور کہا گیا ہے کہ ابھی وہ یہ ذمہ داریاں اعزازی طور پر سرانجام دیں گی۔ کل تک ٹرمپ فیملی کاروبار کی دنیا پر راج کرتی تھی، اب ایک سیاسی خاندان بن گئی ہے۔

یہ ہیں قانون کی ماہر اور ٹرمپ کی سرکاری مُشیر کیلیئن کونوے، ’متبادل حقائق‘ انہی کی اختراع ہے۔ سیاسی معمولات میں اُن کی موجودگی نمایاں ہے۔ خواہ ایک فرضی ’قتلِ عام‘ ہو، جس کی بنیاد پر مسلمانوں کے امریکا میں داخلے پر پابندی عائد کرنا ضروری ہو یا پھر اوول آفس میں کسی ٹین ایجر کی طرح اُن کا طرزِ عمل ہو، کیلیئن کونوے اکثر موضوعِ گفتگو بنتی رہتی ہیں۔

گواڈالُوپے گارسیا ڈے رایوس کا چہرہ ٹرمپ کے 25 جنوری کے صدارتی فرمان کی ایک علامت بن چکا ہے۔ میکسیکو کی یہ 36 سالہ خاتون امریکا میں پیدا ہونے والے دو بچوں کی ماں ہے۔ یہ خاتون اُن گیارہ ملین سے زائد افراد میں سے ایک ہے، جو بغیر قانونی دستاویزات کے امریکا میں رہ رہے ہیں۔ ٹرمپ نے انتخابی مہم میں کیا ہوا اپنا وعدہ پورا کیا اور اس ماں کو گرفتار کر کے اُس کے اہلِ خانہ کے بغیر واپس میکسیکو بھیج دیا۔

ٹرمپ کی ہنگامہ خیز پالیسیاں کارٹون بنانے والوں کا بھی پسندیدہ موضوع ہیں۔ اس سال جرمنی میں کارنیوال کے جلوس نکالے گئے تو کئی فلوٹس میں ٹرمپ کو بھی موضوع بنایا گیا۔ امریکا آزادی کا دیس کہلاتا ہے لیکن ٹرمپ کی پالیسیوں نے امریکا کی اس ساکھ کو نقصان پہنچایا ہے۔ کئی ایک فلوٹس میں تو ٹرمپ اور مس لبرٹی کو ’قابل اعتراض‘ حالت میں بھی دکھایا گیا۔ آپ کو البتہ یہ ایک  تصویر دکھائی جا سکتی ہے۔

جس سرحد پر ابھی صرف جالی ہے، وہ آئندہ برسوں میں مکمل طور پر بند کر دی جائے گی۔ میکسیکو کے ساتھ ملنے والی جنوبی سرحد  کو ایک ناقابلِ عبور رکاوٹ بنا دیا جائے گا۔ یہ بھی ٹرمپ کے مرکزی انتخابی وعدوں میں سے ایک تھا۔ ایک دوسرے سے الگ کر دیے گئے کنبوں کے ارکان اب صرف جالی کے پیچھے سے ایک دوسرے سے مل سکتے ہیں۔ یہاں ایک دوسرے کو صرف ایک انگلی سے ہی چھوا جا سکتا ہے۔

سات سال تک ری پبلکن پارٹی کے ارکان ’اوباما کیئر‘ یعنی ٹرمپ کے پیش رو اوباما کی صحت کے شعبے میں اصلاحات کے خلاف بیانات دیتے رہے لیکن جب ان اصلاحات میں ضروری ترامیم کا معاملہ آیا تو سخت گیر ری پبلکنر نے ان اصلاحات کو کُلّی طور پر ہی ختم کرنے کا مطالبہ کر دیا۔ ایوانِ نمائندگان میں ری پبلکنز کے ترجمان پال رائن کو اپنی شکست تسلیم کرنا پڑی۔ ٹرمپ کے ’ڈیل میکر‘ کے امیج کو سخت نقصان پہنچا۔

امریکی میڈیا ٹرمپ کی صاحبزادی ایوانکا ٹرمپ کو طنز کا نشانہ بناتا رہتا ہے لیکن جرمن میڈیا، بالخصوص عوامی اخبار ’بِلڈ‘ کی جانب سے ایوانکا ٹرمپ کی زبردست پذیرائی کی گئی، جب وہ حال ہی میں جرمن دارالحکومت برلن میں ڈبلیو ٹونٹی کے اجتماع میں شرکت کے لیے آئیں۔ خواتین کے اس بین الاقوامی اجتماع کے موقع پر جرمن چانسلر انگیلا میرکل بھی اُن کے ساتھ بہت بے تکلفی سے مل رہی ہیں۔