یورپی مواصلاتی نیٹ ورک کا قیام، میرکل کی تجویز

انگیلا میرکل نے واضح کیا ہے کہ وہ اگلے ہفتے فرانس کے دورے کے دوران صدر فرانسوا اولانڈ کے ساتھ یورپی کمیونیکیشن نیٹ ورک قائم کرنے کے موضوع کو بات چیت کے ایجنڈے پر فوقیت دیں گی۔ ان کا خیال ہے کہ اس نیٹ ورک کے قائم ہونے کے بعد یورپی حکومتی اہلکاروں اور عوام کی ای میلز اور دوسرے ڈیٹا کی ترسیل امریکا کی رسائی سے دور ہو سکتی ہے۔ میرکل گزشتہ کچھ عرصے سے یورپی اقوام پر معلوماتی ڈیٹا کی زیادہ سخت حفاظت اور اُسے محفوظ رکھنے کو خاص طور پر بین الحکومتی مذاکرات میں ترجیح دے رہی ہیں

جرمن چانسلر انگیلا میرکل آئندہ بدھ کو فرانس پہنچ رہی ہیں۔ انہوں نے اپنے اس دورے کے دوران مجوزہ یورپی مواصلاتی نیٹ ورک کے قیام کو خاص طور پر میزبان ملک کے صدر کے ساتھ زیر بحث لانا چاہتی ہیں۔ گزشتہ برس امریکا کے انٹیلیجنس ادارے نیشنل سکیورٹی ایجنسی کی جانب سے جرمنی سمیت دوسری یورپی اقوام کی بڑی پیمانے پر جاسوسی اور حکومت اور عوام کے بارے میں ڈیٹا کولیکشن کے پروگرام کی تفصیلات سامنے آنے کے بعد واشنگٹن حکومت کو اپنے اتحادیوں کے سامنے قدرے ندامت کا سامنا ہے۔ نیشنل سکیورٹی ایجنسی نے انگیلا میرکل کے ٹیلی فون رابطوں کی ریکارڈنگ سے بھی گریز نہیں کیا تھا۔

انگیلا میرکل نے اپنے ہفتہ وار پوڈکاسٹ پیغام میں واضح کیا کہ جن ممالک میں گوگل اور فیس بُک جیسے اداروں کی جانب سے ڈیٹا کے کمزور حفاظتی انتظامات رکھے گئے ہیں، وہ ایسے جاری آپریشنز کو ناپسند کرتی ہیں۔ یہ امر اہم ہے کہ گوگل اور فیس بُک نے جرمنی جیسے ملکوں میں ڈیٹا کو محفوظ بنانے کے خاطر خواہ انتظامات کر رکھے ہیں۔ میرکل نے اس مناسبت سے بھی کہا کہ صدر اولانڈ کے ساتھ ڈیٹا پروٹیکشن کے موضوع پر بھی کھل کر بات ہو گی اور اِس کے عملی پہلووں پر توجہ مرکوز کی جائے گی۔

میرکل کے مطابق یورپ کے اندر انٹر نیٹ اور ایسی دوسری سہولیات فراہم کرنے والوں کی جانب سے ڈیٹا کی حفاظت کے لیے جو آن لائن سکیورٹی مرتب کی گئی ہے، اس کو بھی زیر بحث لایا جائے گا۔ میرکل کے مطابق وہ اور فرانس مل کر کوشش کریں گے کہ اُن کے شہریوں کی ای میلز اور دوسرا ڈیٹا کسی طور پر بحر اوقیانوس کے پار نہ پہنچ پائے اور اِس کے لیے یورپی ٹیلی کمیونیکیشن نیٹ ورک کا ہونا ضروری ہے۔

دوسری جانب فرانسیسی صدر کے دفتر نے بھی اس کی تصدیق کی ہے کہ پیرس حکومت نے برلن کی اِس تجویز سے اتفاق کرتے ہوئے اِس معاملے پر ابتدائی غوروخوص شروع کر دیا ہے تا کہ جرمن چانسلر کی آمد پر بنیادی معلومات مذاکرات کے دوران پیش کی جا سکیں۔ پیرس سے صدر کے دفتر نے واضح کیا ہے کہ جرمن حکومت کے ساتھ مل کر اس مناسبت عملی پیش رفت کو یقینی بنایا جائے گا۔