David Cameron rikthehet papritur si ministër i Jashtëm – DW – 13/11/2023
  1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW
Live TV
Videot e fundit
Në fokus
EuropaGjermaniaBallkani Perëndimor
Politikë

David Cameron rikthehet papritur si ministër i Jashtëm

13 Nëntor 2023

Rikthimi i një ish-kryeministri në politikë si ministër është i pazakontë. Më parë, kryeministri Rishi Sunak shkarkoi ministren e Brendshme Suella Braverman.

https://p.dw.com/p/4YkE7
London Downing Street David Cameron
Fotografi: Suzanne Plunkett/REUTERS

Rikthimi i David Cameron-it në qeveri shihet si surprizë e madhe. Cameron shërbeu si kryeministër nga viti 2010 deri në vitin 2016. Ai dha dorëheqjen pasi britanikët votuan për daljen e Britanisë nga Bashkimi Evropian në një referendum që ai thirri. Cameron-i më pas bëri fushatë për qëndrimin e vendit të tij në BE.

Cameron pason James Cleverly si ministër i Jashtëm. Cleverly kalon në Ministrinë e Brendshme, siç ka bërë të ditur qeveria pak më parë. Riorganizimi i kabinetit filloi të hënën me shkarkimin e Ministres së Brendshme, të shoqëruar me debate e polemika, Suella Braverman.

Cameron para Downing Street 10
Cameron para Downing Street 10 Fotografi: Sam Hall/empics/picture alliance

Fjalë të ashpra të ministres së Brendshme

Braverman, politikania e ekstremit të djathtë, anëtare e kabinetit të kryeministrit konservator Rishi Sunak, ndezi së fundmi vazhdimisht polemika. Ajo kritikoi ashpër refuzimin e policisë për të ndaluar demonstratën pro-palestineze të shtunën e kaluar në Londër. Ajo akuzoi veçanërisht policinë se mbyllte njërin sy ndaj së majtës dhe se toleronte shkeljet e ligjit nga demonstruesit pro-palestinezë. Shumë vëzhgues i panë deklaratat e tij si një sulm ndaj pavarësisë së policisë.

Ajo publikoi këto akuza në një rubrikë të botuar në gazetën "Times” pa u konsultuar me zyrën e kreut të qeverisë, siç konfirmoi një zëdhënës i Sunakut javën e kaluar. Prandaj shkarkimi i saj pritej.

Suella Bravermanit iu desh të largohej nga posti i saj - si ministre e Brendshme, ajo kishte shprehur vazhdimisht kritika të forta ndaj policisë britanike. Braverman pozon midis njerezve.
Suella Bravermanit iu desh të largohej nga posti i saj - si ministre e Brendshme, ajo kishte shprehur vazhdimisht kritika të forta ndaj policisë britanike.Fotografi: Toby Melville/Getty Images

Pas shkarkimit të saj, Bravermani tha se "ka qenë privilegji më i madh i jetës sime të shërbej si ministre e Brendshme". Ajo shtoi se kishte "më shumë për të thënë në kohën e duhur".

Bravermani shihet si një kandidate me shanse për udhëheqjen e partisë nëse, siç pritej, konservatorët humbasin zgjedhjet parlamentare të planifikuara për vitin e ardhshëm. Në sondazhe, konservatorët në pushtet janë shumë prapa Partisë Laburiste të opozitës. Ka spekulime se duke kritikuar policinë dhe duke bërë komente të tjera populiste të krahut të djathtë, ajo po pozicionohej si kandidate për krahun e djathtë të partisë dhe madje mund të kishte dashur qëllimisht të provokonte largimin e saj. Në shtator, Braverman vuri në dyshim në një fjalim rëndësinë aktuale të Konventës së Gjenevës për Refugjatët.

Në rrjetin social X, dikur Twitter, Partia Konservatore njoftoi: "Sot, Rishi Sunak forcoi ekipin e tij qeveritar për të zbatuar vendime afatgjata për një të ardhme më të mirë”.

aud/ust(dpa, afp, rtr, ap)