Авион се урна во населба во Карачи

Во авионот кој денеска се урна во Карачи, според досегашните сознанија имало 99 патници и 8 членови на екипажот, соопшти портпарол на воздухопловните власти во Пакистан. На снимките од местото на несреќата се гледаат црни облаци од чад кои се издигаат над густо населена населба.

Патничкиот авион на авиокомпанијата ПИА (Pakistan International Airline) доаѓал од Лахоре, вториот по големина град во земјата. Агенциите јавуваат дека се урнал непосредно пред слетувањето. Урнати се неколку објекти. Еден очевидец тврди дека авионот кружел три пати над населбата пред да се урне. Според наводи на пакистанската армија, членови на специјалните сили стигнале на местото на несреќата за да им пружат помош на спасувачките екипи.

По паузата поради корона-кризата, авиосообраќајот во Пакистан беше повторно воспоставен пред неколку дена. Поради претстојниот празник Рамазан Бајрам во моментов многу луѓе патуваат до своите родни места во Пакистан.