Војна во Газа: Протестите против Нетанјаху продолжуваат

На денот кога се одбележаа точно девет месеци од почетокот на војната во Газа, вчера демонстрантите во Израел ги блокираа автопатиштата низ земјата, барајќи оставка од премиерот Бенјамин Нетанјаху и прекин на огнот за да се вратат заложниците кои ги држи Хамас во Појасот Газа.

Во близина на границата со Газа,  демонстрантите пуштија 1.500 црни и жолти балони во воздухот кои го симболизираат вкупниот број на убиени и киднапирани.

Вчерашниот протест започна во 6:29 часот, во исто време кога милитантите на Хамас ги лансираа првите ракети кон Израел во нападот на 7 октомври со кој започна војната. Демонстрантите ги блокираа главните патишта и демонстрираа пред домовите на израелските министри.

Долготрајните напори за постигнување прекин на огнот добија во интензитет деновиве бидејќи Хамас се откажа од клучното барање Израел да ја прекине војната. Групата сè уште сака посредниците да гарантираат траен прекин на огнот, додека Нетанјаху вети дека ќе продолжи да се бори додека Израел не ги уништи воените и управувачките способности на Хамас.

Посредниците од САД, Египет и од Катар ги зајакнаа напорите минатата недела да посредуваат за договор меѓу Израел и Хамас. Покрај тоа, движењето Хезболах соопшти дека ќе ги запре нападите од Либан врз Израел доколку има прекин на огнот во Газа.

Компромисот, кој во саботата го најави Хамас, може да доведе до прва пауза во борбите од ноември и да постави терен за натамошни разговори, иако сите страни и натаму предупредуваат дека договорот сè уште не е завршена работа.

Примирјето би започнало со „целосен“ шестнеделен прекин на огнот за време на кој заложниците - постарите, болните и жените - ќе бидат ослободени од Газа во замена за стотици Палестинци кои се во израелските затвори.

Во текот на тие 42 дена, израелските сили би се повлекле од густо населените области во Газа и ќе им дозволат на раселените да се вратат во своите домови во северниот дел на Газа.