Нов закон за доселување: Франција на антимиграциски курс

Претседателот Емануел Макрон првично го формулираше мандатот за нов закон за имиграција според традицијата на неговата политика „и/и“. Макрон  пред повеќе од една година вети дека неговата влада ќе спроведе „урамнотежена“ реформа. Закон кој ја спречува илегалната миграција и го олеснува депортирањето на одбиените баратели на азил, но и ја промовира интеграцијата на мигрантите кои имаат работа во Франција.

Но,  на парламентарните избори летото 2022 година, партиите од коалицијата го загубија апсолутното мнозинство во Националното собрание. Деснoграѓанските републиканци (Les Républicains - LR) доминираат во Сенатот. Под притисок на екстремно десничарската партија Национален сојуз  (Rassemblement National - RN) на Марин Ле Пен, републиканците во последниве години се насочија кон десно. Затоа на набљудувачите со недели им беше јасно дека владата ќе добие мнозинство во парламентот само со значително построги реформи. Макрон неодамна повика на „интелигентен компромис“ меѓу страните.

Сенатот уште во рана фаза ја избриша централната точка на реформата. На мигрантите не им се дава право на престој во Франција дури и ако најдат работа во сектори со недостиг на работна сила. Владата мораше да направи дополнителни болни отстапки во комисијата за посредување (commission mixte paritaire), која се состои од седум сенатори и седум пратеници. Со новиот закон за доселување, Франција се приклучува кон антимиграцискиот курс, на кој што неодамна, меѓу другите, тргнаа и нордиските земји.

Приоритет за Французите во делот на социјалните бенефиции

Владата ѝ направи големи отстапки на конзервативната опозиција особено кога станува збор за дозволите за престој и пристапот до социјалните бенефиции. За детски додаток или право на стан, се предвидува период на чекање од пет години за оние кои немаат работа. Имигрантите со работа мора да чекаат две и пол години.

Посебно спорен меѓу владината фракција и републиканците беше пристапот до додаток за домување (АПЛ). Во иднина, странците кои не се членки на ЕУ ќе имаат право на додаток за домување само по пет години престој во Франција. Оној кој има работа, студира или е признат барател на азил, ќе добие поддршка по само три месеци престој.

Едвај некакво олеснување за „Sans Papiers“

Мигрантите без право на престој, таканаречените „sans papiers“, секогаш се предмет на жестоки дебати во Франција. Правилата се заоструваат и во тој дел. Во иднина, префектот ќе има можност да им даде дозвола за престој на овие луѓе доколку работат во професии каде има недостиг на работна сила, ако живеат во Франција најмалку три години и последен пат биле вработени најмалку дванаесет месеци. Сепак, дозволата за престој важи само една година.

Работниците можат да поднесат барање за ваква дозвола за престој и без согласност од својот работодавач, што се смета за отстапка на опозицијата. „Sans Papiers“-реформата засега е декларирана како експеримент и треба да важи до 2026 година.

Нелегалниот престој во Франција повторно се смета за кривично дело и ќе се казнува со една година затвор и парична казна од 3750 евра. Шефот на ЛР, Ерик Соти, од министерот за внатрешни работи Жералд Дарманин доби ветување дека ќе се забрза изградбата на затвори за депортација. До 2027 година во Франција треба да бидат отворени 11 нови „административни прифатни центри“.

Горни граници за имиграција

Иако владата смета дека имигрантските квоти поставени од Парламентот се неуставни, компромисот предвидува соодветна регулатива за следните три години. Според тоа, горната граница важи за странците од земји кои не се членки на ЕУ - барателите на азил се исклучени од тоа. Многу политичари од претседателскиот табор, но и од левичарската опозиција се надеваат дека Уставниот совет ќе ја поништи регулативата при ревизија. Министерот за внатрешни работи Дарманин, кој и самиот е поранешен член на републиканците, во вторникот вечерта (19.12) во Сенатот опиша некои делови од законот како неуставни.

Отежнат пристап до државјанство

Странците родени во Франција во иднина веќе нема да добиваат автоматски француско државјанство штом ќе станат полнолетни. Во периодот помеѓу 16. и 18. година од животот ќе мора да се поднесе барање за тоа. Оној кој бил осуден за кривично дело, нема да добие државјанство.

На лицата со двојно државјанство може да им се одземе француското државјанство доколку биле осудени за убиство со умисла на некој државен службеник. Ова правило би требало да ги штити полицајците, пожарникарите и наставниците.

Освен тоа, пратениците донесоа и построги правила за спојување на семејствата и кауција за студентите за да може да се покријат евентуални трошоци за протерување. На странците им се отежнува и пристапот до здравствено осигурување.

Реакции на реформата

Лидерката на Националниот сојуз, Марин Ле Пен, го опиша компромисот како „идеолошка победа“ за нејзината партија. „Сега 'националниот приоритет', односно предноста што им се дава на Французите пред странците за одредени социјални бенефиции, конечно е закон“, рече Ле Пен, чија партија моментално води во анкетите. Сите 88 пратеници на РН гласаа за новиот закон во Националното собрание, а „за“ беа и 62-та републикански пратеници.

Претседателскиот табор немаше да има мнозинство без поддршка на десницата. Против заострувањето гласаа 27 членови на коалициските пратенички групи, а 32-ца беа воздржани. Министерот за здравство Орелиен Русо по гласањето поднесе оставка на функцијата. Какви последици ќе имаат тензиите во владиниот табор ќе покажат наредните денови.

Од другата страна на политичкиот спектар, левичарската опозиција ја обвини владата за „губење на целото достоинство“ доколку го протурка законот во парламентот со гласовите на ЛР и РН. Мигрантите и бегалците кои демонстрираат ја гледаат реформата како нова форма на тешкотии.

Овој текст првично беше објавен на ДВ на германски јазик