Украина смее да користи германско оружје за цели во Русија

По САД, и Германија исто така ѝ дозволи на Украина да го користи испорачаното германско оружје против одредени руски цели. Портпаролот на владата Штефен Хебештрајт изјави дека тоа е во согласност со меѓународното право.

„Во последните недели, посебно во регионот Харков, Русија ги користи нејзините непосредно гранични области за подготовка, координирање и вршење на напади. Заедно сме уверени дека меѓународното право на Украина меѓународното право ѝ го дава правото да се брани од руските напади. За таа цел,  таа може да го користи и оружјето  кое ѝ е испорачано од Германија, во согласност со нејзините меѓународни правни обврски“, наведе портпаролот на владата Штефен Хебештрајт во Берлин.

Германската влада континуирано ја „усогласува својата поддршка  со своите најтесни сојузници  во директен дијалог со украинската влада, во зависност од развојот на воените настани", истакна владиниот портпарол.

Претходно  САД одобрија употреба на американско оружје  за напади врз цели во Русија, во ограничен обем. Ова се однесува само на  контраудари во одбрана на градот Харков  во источниот дел од Украина, како што пренесоа повеќе американски медиуми.

Украинската војска се наоѓа под воен притисок во повеќе сектори од фронтот, посебно во областа Харков, каде руските трупи постојано вршат напади.