Русите сакаат да го испрашуваат Навални

Обвинителството во Берлин било задолжено од Сенатската управа за правда да собере информации за здравствената состојба на затруениот критичар на Кремљ, кој се наоѓа на лекување во болницата Шарите во главниот град на Германија. Обвинителството во Берлин на Твитер соопшти дека тоа важи под услов согласност да даде и Навални. Други информации во моментов не се даваат.

Русија во случајот на Навални бара повеќе информации од Германија. Сибирската полиција соопшти дека руските полицајци сакаат да ги придружуваат германските колеги во истрагата и да добијат можност за поставување дополнителни прашања, јави ВДР. Руското Министерство за внатрешни работи, како што се вели, подготвувало соодветно барање.

Рускиот министер за надворешни работи Сергеј Лавров денеска ги нарече „без основа“ обвинувањата од Германија дека зад инцидентот стојат руски државни службеници. Владата во Москва најави дека ќе продолжи со својата истрага за случајот. За таа цел до Германија можеби ќе биде упатено второ барање за информации, но непосредни разговори помеѓу рускиот претседател Путин и германската канцеларка Меркелне се планирани. 

Случајот Навални сѐ повеќе ги оптоварува германско-руските односи. Според наводи на германската влада, специјална лабораторија на Бундесверот утврдила „без сомневање“ дека Навални бил затруен со хемиска супстанција од групата Новичок. Руските лекари, пак, тврдат дека не пронашле знаци за труење на Навални.

Најпознатиот критичар на Кремљ колабираше во текот на еден лет од Сибир за Москва на 20 август. По принудното слетување на авионот, тој беше префрлен во болица во Омск, каде престојуваше два дена, по што беше префрлен во Германија.